Душанбе. 2-юми июл. ОИ «Азия-Плюс» – Рӯзҳои 3-4-уми июл дар шаҳри Душанбе ҷаласаи Шӯро оид ба корҳои ҷавонони кишварҳои узви Иттиҳоди Давлатҳои Мустақил доир мегардад.
Чӣ тавре ки ба ОИ «Азия-Плюс» аз Кумитаи иҷроияи ИДМ иттилоъ доданд, дар ҷаласа лоиҳаи Стратегияи ҳамкории байнулмилалии ҷавонони кишварҳои узви ИДМ, ки аз ҷониби Вазорати маорифи Беларус таҳия гардидааст, мавриди баррасӣ қарор хоҳад гирифт.
Бино ба иттилои манбаъ, муқаррароти Стратегия ба баланд бардоштани сатҳи худогоҳии миллӣ ва шаҳрвандии ҷавонон, таҳаммулпазирӣ, фаъолияти густардаи зеҳниву эҷодӣ ва варзишӣ равона шудааст. «Дар лоиҳа роҳандозии чорабиниҳои такмил ва ҷорӣ сохтани фановариҳои ҷадид зимни кор бо ҷавонон, нигаҳдорӣ ва афзудани мероси фарҳангии мардум ва барқарор сохтани робитаи мустаҳками фарҳангӣ ва дӯстӣ миёни ҷавонони кишварҳои узви ИДМ пешбинӣ шудааст», – гуфт манбаъ.
Зикр гардид, ки дар робита бо соли 2009-ро Соли ҷавонон дар ИДМ эълон намудан, иштирокдорони ҷаласа оид ба андешидан ва баргузории чорабиниҳо ба ин муносибат дар кишварҳояшон низ табодули афкор хоҳанд кард.
