Душанбе. 11-уми июл. ОИ «Азия-Плюс» – Дар Тоҷикистон намояндагии Донишгоҳи «Паёми нур»-и Эрон боз мешавад.
Чӣ тавре ки ба ОИ «Азия-Плюс» мудири шӯъбаи таҳлил ва рушди ислоҳот дар бахши маорифи Вазорати маорифи ҶТ Хаёл Бобоев иттилоъ дод, донишгоҳи мазкур яке аз муассисаҳои таълимии маъруфи Эрон буда, дар тамоми гӯшаву канори Эрон ҳудуди 500 намоянда дорад. «Ба ифтитоҳи намояндагии донишгоҳ дар Тоҷикистон мақомоти раҳбарии ин муассисаи таълимӣ, ки дар кори намоишгоҳи илмиву маърифатии Тоҷикистону Эрон дар Душанбе ширкат варзиданд, таваҷҷӯҳ зоҳир сохтанд», – гуфт ӯ.
Ба гуфтаи Х.Бобоев, боз як зумра намояндагони макотиби олӣ ва марказҳои илмии Эрон дар муроҷиат ба вазири маорифи ҶТ Абдуҷаббор Раҳмонов изҳори омодагӣ карданд, ки оянда дар Тоҷикистон намояндагиҳои худро ифтитоҳ карданианд.
