Душанбе. 22-юми июл. ОИ «Азия-Плюс» – Раёсати Бозрасии давлатии автомобилии шаҳри Душанбе аз 21 то 31-уми июл дар роҳҳои мошингарди пойтахт таҳти унвони «Газ» амалиёт баргузор мекунад.
Чӣ тавре ки ба ОИ «Азия-Плюс» сардори маркази матбуоти шӯъбаи БДА дар пойтахт Шерафкан Латифов иттилоъ дод, ҳадафи аслӣ аз баргузории амалиёт – пешгирӣ ва ошкор сохтани насби баллонҳои газӣ дар дохили мошинҳо аст. «Ғайр аз ин, дар чаҳорчӯбаи баргузории амалиёт баҳри
ошкор сохтани мошинҳое, ки бидуни иҷозатномаи дахлдор аз баллонҳои газӣ истифода мебаранду ё он ба талабот ҷавобгӯ нест, рейдҳо доир карда мешаванд», – гуфт ӯ.
Тибқи маълумоти БДА, дар пойтахт зиёда аз 40 ҳазор адад мошинҳои хусусӣ ва 7 ҳазор адад мошинҳои мутаалиқ ба тавозуни давлатӣ ба қайд гирифта шудаанд, вале кормандони БДА дақиқ огаҳ нестанд, ки чӣ миқдоре аз ин мошинҳо бо таҷҳизоти газӣ кор мекунанд.
