Душанбе. 22-юми июл. ОИ «Азия-Плюс» – Имрӯз дар Тоҷикистон Рӯзи забон ҷашн гирифта мешавад.
Чӣ тавре ки ба ОИ «Азия-Плюс» сухангӯи раиси шаҳри Душанбе Шавкат Саидов иттилоъ дод, ба ин муносибат имрӯз дар боғи устод Абӯабдуллоҳи Рӯдакӣ чорабинии идона баргузоор мешавад, ки аз ҷониби Вазорати фарҳанги ҶТ дар ҳамдастӣ бо Кумитаи радиову телевизион ва Иттифоқи нависандагони Тоҷикистон созмон дода шудааст.
Ба гуфтаи Ш.Саидов, дар чорабиниҳои ҷашнӣ муовини нахуствазири ҷумҳурӣ Руқия Қурбонова, раиси Иттифоқи нависандагони Тоҷикистон Меҳмон Бахтӣ, намоянадгони мақомоти шаҳрдории пойтахт ва меҳмонон ширкат меварзанд. «Шоми имрӯз соати 17 дар боғҳои фарҳангу фароғатии ба номи Айнӣ, «Дӯстии халқҳо», «Кӯли ҷавонон» ва майдони «800-солагии Москва» сайругашти оммавии шаҳрвандон, базмҳои шеъру суруд, намоиш ва фурӯши маҳсулоти қаннодӣ ташкил карда мешавад», – гуфт ӯ.
Сухангӯи раиси пойтахт афзуд, имрӯз ҳамчунин дар Амфитеатр маҳфили идона бо иштироки донишмандону адибон, устодони санъат ва ҷавонони эҷодкори пойтахт баргузор шуда, дар китобхонаи ба номи Абулқосим Лоҳутӣ таҳти унвони «Забон – боигарии миллат» конфронси илмӣ доир мегардад.
