Душанбе. 13-уми июл. «Азия-Плюс» — | Саридораи геологияи ҷумҳурӣ ба ҳукумати Тоҷикистон барои имзо иҷозатномаи «Ширкати саноати кӯҳкории Тоҷикистону Чин»-ро ҷиҳати омӯзиши геологии кони сурбу руҳи «Зарнисори Шимолӣ» ирсол кардааст.
Зимни нишасти хабарӣ сардори Саридораи геологияи назди ҳукумати ҷумҳурӣ Азим Иброҳим изҳор дошт, ки миёни Хадамоти геологии Вазорати замин ва захираҳои Чин ва Саридораи геологияи ҷумҳурӣ оид ба баргузории корҳои муштарак ҷиҳати омӯзиши геологии минтақаҳои наздимарзӣ шартнома ба имзо расидааст. «Айни замон корҳои саҳройӣ оғоз гардида, роҳандозии чунин ҳамкориҳо бо хадамоти геологии кишварҳои дигар низ дар ҳоли рушд аст», – гуфт ӯ.
Дар ҳамин ҳол, А.Иброҳим зикр намуд, ки барои бозпас гирифтани иҷозатномаи ҶДММ «Марвис», ки дар минтақаи шимоли кишвар ба ҷустуҷӯйи нафту газ машғул аст, тамоми ҳуҷҷатҳо омода карда шудаанд. «Пас аз дастрас намудани хулосаҳои вазорату идораҳои дахлдор ин ҳуҷҷатҳо ба ҳукумат пешниҳод карда мешаванд», – иброз дошт вай.
Номбурда афзуд, дар нимсолаи авали соли равон иҷозатномаи ҶДММ «Нурафзои Ширин», ки ба ҷустуҷӯйи кони ангишти сангӣ машғул буд, низ бозпас гирифта шудааст.
