Душанбе. 1-уми август. «Азия-Плюс» — | Сармураббии дастаи мунтахаби футболи Тоҷикистон Пӯлод Қодиров ба истеъфо рафт.
Тавре аз Федератсияи футболи Тоҷикистон иттилоъ доданд, имрӯз дар Шӯрои Кумитаи иҷроияи федератсия қарор шудааст, аризаи сармураббӣ дар бораи истеъфояш қонеъ гардонида шавад.
Баъди ду шикаст аз дастаи Сурия дар қуввваозмоии даври интихобии мусобиқоти Ҷоми ҷаҳон-2014 оид ба футбол Пӯлод Қодиров тасмим гирифт, ки ба истеъфо равад. Ҳамин тариқ дастаи Тоҷикистон аз иштироки минбаъда дар бозиҳои даври интихобии Ҷоми ҷаҳон-2014 маҳрум гардид.
Пас аз анҷоми вохӯрӣ дар шаҳри Турсунзода (шикаст бо ҳисоби 0 бар 4) Пӯлод Қодиров зикр кард, ки «мутаассифона, мо ба таври бояду шояд ба ин қувваозмоиҳо омодагӣ гирифта натавонистем. Мо ба суриягиҳо аз ҳама ҷиҳат бозиро бохта, ба даври дигар роҳхат гирифта натавонистем».
«Агар мақомоти раҳбарии Федератсияи футболи Тоҷикистон чунин шуморанд, ки ман аз ӯҳдаи иҷрои вазифаам набаромадам, ман ба истеъфо омодаам», – гуфта буд ӯ он замон.
Сармураббии нави дастаи мунтахаби футболи Тоҷикистон дар ҷаласаи наздиктарини Кумитаи иҷроияи Федератсия интихоб хоҳад шуд.
