Душанбе. 2-юми август. «Азия-Плюс» — | Субҳи имрӯз нахуствазири ҷумҳурӣ Оқил Оқилов ҷиҳати шиносоии наздик бо қитъаи осебдидаи роҳи мошингарди миёни ноҳияҳои Айнӣ ва Кӯхистони Мастчоҳ озими ноҳияи Айнии вилояти Суғд гардид.
Тавре ба ОИ «Азия-Плюс» аз котиботи нахуствазири кишвар хабар доданд, зимни ин сафар Оқил Оқилов бо вазъи иҷтимоиву иқтисодии ноҳия низ шинос шуда, бо мақомоти раҳбарӣ ва фаъолони ноҳия мулоқот хоҳад кард.
«Ҳамчунин нахуствазири кишвар бо шахсони масъули вилоят ва ноҳия ҷараёни баргузории ислоҳот дар бахшҳои кишоварзӣ, тандурустӣ ва маориф дар водии Зарафшонро низ баррасӣ хоҳад кард», – гуфт манбаъ.
Ёдрас мекунем, ки ахири моҳи июл бар асари сангреза як қитъаи роҳи мошингарди байни ноҳияҳои Айнӣ ва Кӯҳистони Мастчоҳ баста шуд.
