Тибқи маълумоти таҳқиқоти Бунёди «Афкори умум», 43%-и русиягиҳо узвияти Тоҷикистону Қирғизистон ба Фазои ягонаи иқтисодиро мепазиранд.
Гуфта мешавад, 35% шаҳрвандони пурсидашудаи Русия ба ин масъала назари манфӣ доранд ва 24% дар посух ба ин суол мушкилӣ кашидаанд. Тавре аз назарсанҷии бунёди мзкур бармеояд, агар доираи кишварҳои узви Фазои ягонаи иқтисодӣ тавсеъа ёбад, ба он Украина (24%), Арманистон (19%), Тоҷикистон, Ӯзбекистон, Қирғизистон (15%-ӣ), Озарбойҷон (14%), Туркманистн ва Молдова (23%-ӣ) шомил мегарданд. Шомил шудани Гурҷистону Латвияро – 6%, Литваро – 5% ва Эстонияро – 4%-и пурсидашудагон имконпазир донистаанд. Дар ҳамин ҳол, 13%-и пурсидашудагон бар ин назаранд, ки доираи кишварҳои узви Фазои ягонаи иқтисодӣ тавсеъа нахоҳад ёфт.
Бино ба маълумоти таҳқиқот, 61%-и шаҳрвандони пурсидашудаи Русия ҷонибдор ва 20% муқобили муттаҳид шудани собиқ кишварҳои Иттиҳоди Шӯравӣ мебошанд.
Ахири моҳи октябр нахуствазири Русия Владимир Путин изҳор кард, ки ба Иттиҳоди гумрукӣ ва Фазои ягонаи иқтисодӣ кишварҳои дигар, аз ҷумла Қирғизистон ва Тоҷикистон низ шомил шуда метавонанд.
Рӯзи ҷумъаи ҳафтаи гузашта, дар Маскав сарони кишварҳои Русияву Белорус ва Қазоқистон дар бораи таъсиси Фазои ягонаи иқтисодӣ як силсила аснод ба имзо расониданд. Дар Кохи Кремл Дмитрий Медеведев, Александр Лукашенко ва Нурсултон Назарбоев зери Эъломия дар бораи Ҳамгиройии иқтисодии авруосиёӣ, Шартнома дар бораи Комиссияи иқтисодии авруосиёӣ ва регламенти кори он имзо гузоштанд. Ҳадафи ниҳоии имзои Эъломия дар бораи Ҳамгиройии иқтисодии авруосиёӣ таъсиси Фазои ягонаи иқтисодии кишварҳо унвон мешавад.
Акс аз www.econ.spbu.ru
