Дар мавсими тирамоҳу зимистони соли равон дар Тоҷикистон 15 ҳазору 749 нафар гирифторони бемории зуком ё худ грипп ба қайд гирифта шуданд, ки нисбат ба ҳамин давраи соли гузашта 800 нафар зиёдтар аст.
Тавре ба ОИ «Азия-Плюс» сардори Раёсати давлатии назорати санитариву эпидемиологии Вазорати тандурустии ҷумҳурӣ Наврӯз Ҷаъфаров хабар дод, дар ҳамин ҳол, соли равон танҳо як навъи зуком – НЗ ба қайд гирифта шудааст ва ин ҳам дар ҳолест, ки соли гузашта се навъи ин ангезанда – H1N1, H3 ва В сабт гардида буд.
«Соли 2010 ҷиҳати пешгирии зукоми навъи H1N1 маъракаи эмгузаронӣ доир гардида буд ва аз ин рӯ, айни замон ҷисми мардум ба навъҳои гуногуни зуком метавонад тобовар бошад», – гуфт ӯ.
Дар ҳамин ҳол, Ҷаъфаров илова намуд, ки афзоиши ҳодисаҳои сироят ба гепатити вирусии А ё зардпарвин (бемории Боткин), ки бештар тавассути маҳсулоти ғизойӣ ё об ба каси дигар мегузарад, дар ҳоли коҳишёбӣ аст. «Ҳарорати пасти ҳаво ба афзоиши ангезандаҳо имкон намедиҳад. Аз ин рӯ, метавон гуфт, ки сатҳи афзоиш қатъ гардида, моҳҳои март ё нимаи апрели соли оянда шумори гирифторони ин ангезанда ба таври назаррас коҳиш хоҳад ёфт», – афзуд номбурда.
Қобили зикр аст, ки айни замон аз 9 ҳазору 385 ҳодисаи сабтшудаи гирифторӣ ба бемориҳои гепатит дар Тоҷикистон, 8 ҳазору 955 нафарашонро маҳз мубталоёни бемории гепатити А ташкил медиҳанд, ки 80%-и онҳо кӯдакону наврасон мебошанд. Соли гузашта дар ҷумҳурӣ 8 ҳазору 682 ҳодисаи гирифторӣ ба бемории гепатити А ба қайд гирифта шуда буд.
