Дар шаҳри Душанбе ифтитоҳи якчанд мактабҳои шабона барои коргарҷавонон ба нақша гирифта шудааст. Дар ҳар як ноҳияи шаҳр кушодани яктогӣ чунин мактаб пешбинӣ мешавад.
Тавре ба ОИ «Азия-Плюс» дар Раёсати маорифи шаҳри Душанбе хабар доданд, омӯзиш дар ин мактабҳо бо забонҳои русиву тоҷикӣ ба роҳ монда мешавад.
Айни замон лоиҳаи дахлдор дар ин хусус омода гардида, барои мувофиқа ба идораҳои дахлдор пешниҳод шудааст. Пас аз гирифтани тамоми хулосаҳо мӯҳлати оғози машғулиятҳо ва сарчашмаҳои маблағгузорӣ муайян карда мешавад.
Бо анҷоми таҳсил толибилмон чун хонадагони макотиби таҳсилоти умумӣ номаи камолот мегиранд. Машғулиятҳо шомгоҳон дар вақти барои ҷавонон мувофиқ гузаронида мешаванд.
