Панҷ кони тилову нуқраи Тоҷикистон ба қабули сармоягузорон ҷиҳати баргузории корҳои иктишофӣ ва истихроҷ омодаанд.
Тавре ба ОИ «Азия-Плюс» сардори Сарраёсати геологияи назди ҳукумати ҷумҳурӣ Азим Иброҳим хабар дод, ба рӯйхати конҳои ниёзманд ба сармоягузорӣ кони Мосриф, «Чоре», «Икар» ва ҳамчунин конҳои чанде қабл кашфшудаи тилову нуқраи «Чулбуе» ва «Мирханд» шомил мебошанд.
«Ғайр аз ин, оид ба кашфу ифтитоҳи навъи нави тилои генетикӣ корҳои таҳқиқотӣ идома доранд. Мо боварӣ ҳосил кардем, ки захираҳои ин навъи тило мавҷуд аст, вале методикаи кори қаблан дар ин самт доиргардида моро қонеъ накард. Аз ин рӯ, қарор додем, ки аз он даст кашем. Умедворем, ки минбаъд он натиҷаҳои назаррас хоҳад дод», – гуфт вай.
Ба гуфтаи ӯ, лоиҳаи нав таҳия гардида, ба шӯрои илмӣ-техникӣ пешниҳод хохад шуд. «Чунин навъи захираҳои тило дар Панҷакент, Ҳисор, Қаратоғ, Лучоб, Варзоб, Дарвоз мавҷуд буда, онҳо ба харитаи геологӣ ворид карда шудаанд ва ба геологҳо дозим аст, ки мавҷуд будан тилои саноатӣ дар ин мавзеъҳоро исбот намоянд.
Дар Тоҷикистон ҳашт корхонаи истихроҷи тило фаъолият мекунад, ки бузургтарини он КМ «Зарафшон» (шимоли ҷумҳурӣ)-и Тоҷикистону Чин, КМ «Апрелевка» (шимоли кишвар) ва Корхонаи давлатии истихроҷи тило «Тилои тоҷик» (ҷануби ҷумҳурӣ) мебошад. Ҳамасола дар Тоҷикистон ҳудуди ду тонна тило истихроҷ мегардад.
