Дар рӯзи таҷлили ҷашни Рӯзи пойтахт мақомоти шаҳрдории Душанбе аз озмунҳои «Мактаби сол – 2011», «Директори сол – 2011», «Муаллими сол – 2011», «Кӯдакистони сол – 2011», «Мудири кӯдакистони сол – 2011», «Мураббии сол – 2011» ва «Синфи беҳтарини сол – 2011» натиҷагирӣ кард.
Бино ба маълумоти хадамоти матбуоти мақомоти шаҳрдорӣ, мактаби № 13-и пойтахт ғолиби озмуни «Мактаби сол – 2011» дониста шуда, коллективи меҳнатии мактаб бо манзили зисти сеҳуҷрадор қадрдонӣ шуд.
Директори гимназияи №9 Гулрӯ Сатторова «Директори сол – 2011» эътироф гардида, бо 3 ҳазор сомонӣ маблағ сарфароз гардонида шуд.
Омӯзгори фанни забон ва адабиёти руси мактаби таҳсилоти умумии №78-и ноҳияи Фирдвавсӣ Виталий Рябсев дар озмуни «Муалллими сол – 2011» ғолиб омада, бо 2 ҳазор сомонӣ маблағ қадрдонӣ шуд.
Ғайр аз ин, синфи беҳтарини сол низ муайян карда шуд. Мактаби №55-и ноҳияи Шоҳмансури пойтахт дар озмуни «Синфи беҳтарини сол – 2011» ғолиб дониста шуд. Акнун роҳбари ҳамин синф Ҳафизова Нигина дар ҳаҷми 200 (дусад) сомонӣ барои 10 моҳ, сардори синф Каримова Шаҳноза дар ҳаҷми 60 (шаст) сомонӣ барои 9 (нӯҳ) моҳ, хонандагони синф 26 (бисту шаш) нафар, ҳар кадоме дар ҳаҷми 50 (панҷоҳ) сомонӣ барои 9 (нӯҳ) моҳи соли 2012 бо идрорпулии Мақомоти иҷроияи маҳаллии ҳокимияти давлатӣ дар шаҳри Душанбе ҳавасманд гардонида мешаванд.
Ғолиби озмуни «Кӯдакистони сол – 2011» – кӯдакистони № 157 ноҳияи Сино дар ҳаҷми 3 ҳазор сомонӣ қадр карда шуд. Ғолиби озмуни «Мудири кӯдакистони сол – 2011» – мудири кӯдакистони № 44 ноҳияи Шоҳмансур Усмонова Зебо бо мукофотпулӣ дар ҳаҷми 2 ҳазор сомонӣ ва ғолиби озмуни «Мураббии сол – 2011» – мураббии кӯдакистони № 117 ноҳияи Фирдавсӣ Аъзамова Олмахон дар ҳаҷми 1,5 ҳазор сомонӣ мукофотонида шуданд.
