Моҳи июни соли равон нафақахӯрони шаҳри Хуҷанд ба низоми пардохти кортӣ мегузаранд.
Чуноне ба ОИ «Азия-Плюс» муовини роҳбари филиали № 23-и БДА «Амонатбонк» дар вилояти Суғд Бадриддин Аминов хабар дод, нимаи дуюми соли ҷорӣ натанҳо 14410 нафар нафақахӯрони шаҳри Хуҷанд, балки боз 31 ҳазор нафақахӯрони ноҳияҳои Истаравшану Бобоҷон Ғафуров ва шаҳри Қайроққум низ ба низоми пардохти нафақа тавассути корти бонкӣ гузаронида мешаванд.
«Айни замон ба ин шаҳру навоҳӣ 49 адад терминалҳо ирсол ва санҷида шуданд. Хазинадорон ва ҳайати шахсии хизматгузорӣ низ дар давраи омӯзишии дахлдор нозукиҳои чунин тарзи пешниҳоди хизматгузорио аз бар намуданд. Феълан кортҳо дар Русия мавриди таҳия қарор доранд», – гуфт вай ва афзуд, ки моҳи июн кортҳо ба нафақахӯрони шаҳри Хуҷанд тақим гардида, онҳо метавонанд аз он истифода кунанд.
Ба қавли Б.Аминов, аз 6-уми январи соли ҷорӣ 17207 нафар сокинони шаҳри Исфара ва 1072 нафар сокинони шаҳри Табошар тавассути корти бонкӣ нафақаи худро дастрас менамоянд. «То соли 2013 тамоми нафақахӯрони вилояти Суғд бояд ба низоми тавассути корти бонкӣ пардохт намудани нафақа гузаронида шаванд», – иброз дошт бонкдор.
Номбурда афзуд, айни замон дар ин минтақа беш аз 179 ҳазор нафар нафақахӯрон ба сар бурда, ҳар моҳ ҷиҳати пардохти нафақа ба онҳо 25,4 млн. сомонӣ маблағ зарур аст.
