Бори нахуст дар Тоҷикистон ба нобиноён китоби Қуръони шариф бо ҳуруфи Брайл ба забони тоҷикӣ тақдим карда шуд. Маросими расмии тақдими китоб ба нобиноён дар Маркази исломии Тоҷикистон доир гардид.
Раиси Шӯрои уламои Маркази исломии Тоҷикистон Саидмукаррам Абдуқодирзода зимни суханрониаш зикр кард, ки китоби Қуръон барои нобиноён аз ҷониби Маркази исломии ҷумҳурӣ дар ҳамдастӣ бо Ҷамъияти нобиноёни шаҳри Душанбе ва бо дастгирии ҳукумати кишвар нашр шудааст. Ба гуфтаи ӯ, теъдоди умумии нашри китоби мазкур алҳол 20 нусха буда, ҳар як маҷмӯъ аз 9 ҷилд иборат аст.
Раиси Ҷамъияти нобиноёни шаҳри Душанбе Холмаҳмад Тенгниев ба муфтиёту ҳукумат ва ҳамчунин ширкати «Фавз» барои кӯмак дар таъмини нобиноёни мусулмони Душанбе бо китоби Қуръон изҳори миннатдорӣ намуд.
Ҷонибҳо зикр карданд, ки минбаъд низ омодаанд барои нобиноёни ҷумҳурӣ китоби Қуръонро ба нашр расонанд. С.Абдуқодирзода дар ҷамъи журналистон изҳор дошт, ки Маркази исломӣ омода аст, ки барои нобиноён натанҳо адабиёти динӣ, балки дигар китобҳоеро низ ба нашр расонад, ки таваҷҷуҳи нобиноёнро ба зиндагиву эҷод ва кор бедор созад.
