Созмони байнулмилалии «Хабарнигорони бидуни марз» ба журналисти телевизиони «Сафина», ки мавриди лату кӯби шахсони номаълум қарор гирифта буд, дар ҳаҷми 300 доллари ИМА кӯмак кард. Дар ин бора аз Анҷумани миллии воситаҳои ахбори оммаи мустақили Тоҷикистон (АМВАОМТ) хабар доданд.
Ба иттилои манбаъ, рӯзи 25-уми май раиси АМВАОМТ Нуриддин Қаршибоев маблағи зикршударо ба журналист супурдааст.
«Ташкилоти мо баҳри расонидани кӯмаки моддиву маънавӣ ба Далер Шарифов, ки барои изҳори мавқеи шаҳрвандӣ ва фаъолияти касбӣ осеб дид, ба созмони «Хабарнигорони бидуни марз» муроҷиат намуд ва ин кӯмак гувоҳи ҳамраъйии онҳост», – гуфт Қаршибоев.
Ба қавли номбурда, далер Шарифов аз АМВАОМТ ва шарикони он барои дастгириву кӯмак изҳори миннатдорӣ намуда, гуфтааст, сарфи назар аз таҳдиду саддгузориҳо, минбаъд низ фаъолияти густардаи журналистии худро идома дода, нияти аз роҳи интихобкарда баргаштанро надорад.
