Прокуратураи вилояти Хатлон нисбат ба ду тан аз соҳибкорони ноҳияи Панҷ барои фурӯши DVD-дискҳое, ки ба меъёри давлатӣ ҷавобгӯ набуданд, парвандаи ҷиноӣ боз намуд.
Тавре ба ОИ «Азия-Плюс» сармуфаттиш оид ба парвандаҳои махсусан муҳими прокуратураи вилояти Хатлон Бахтиёр Ҳайдаров хабар дод, соҳибкорон Ҷалолиддин Раҳматов ва Сайдамир Шоҳов дар бозори марказии ноҳияи Панҷ ба фурӯши дискҳои сериалҳои туркӣ, ки намоиши онҳо дар Тоҷикистон манъ карда шуд, машғул будаанд. «Ба онҳо мутобиқи моддаи 294, қисми 2-и КҶ ҶТ (Фиреби истеъмолгар) айбнома пешниҳод гардид.
Ба гуфтаи сармуфаттиш, прокуратураи вилояти Хатлон тафтишоти пешакиро оид ба ин қазия ба анҷом расонида, 28-уми май парвандаи ҷиноӣ ба суди ноҳияи Панҷ ирсол гардидааст. «Суд масъулияти ҷавобгарӣ барои фиреби истеъмолгарон нисбати сифати маҳсулотро муайян хоҳад кард», – гуфт ӯ.
Ёдрас мекунем, ки айни замон дар Тоҷикистон фурӯши сериалҳои туркии миёни аҳолӣ писандида манъ карда шуд. Ба ин рӯйхат панҷ сериал – «Ҳомиён», «Пайроҳаи тақдир», «Мисли Юсуф», «Хаёлҳои сабз» ва «Водии гургон» шомиланд.
