Дар ҷаласаи Комиссияи марказии интихобот ва раъйпурсии Тоҷикистон таҳти раёсати роҳбари КМИР Шермуҳаммад Шоҳиён аз интихобот ба аъзои Маҷлиси миллии Маҷлиси Олии ҶТ аз ҳавзаи интихоботии пойтахт, ки рӯзи шанбеи ҳафтаи гузашта доир гардид, натиҷагирӣ шуд.
Тавре ба ОИ «Азия-Плюс» як манбаъ аз КМИР хабар дод, аз натиҷаҳои овоздиҳӣ маълум шуд, ки Бахтиёр Худоёров, узви Ҳизби халқии демократии Тоҷикистон, роҳбари Дастгоҳи иҷроияи сарвари давлат, сокини шаҳри Душанбе бо аксари кулли овозҳо узви Маҷлиси миллии Маҷлиси Олии ҶТ интихоб гардидааст.
Мутобиқи модаи 56-и Қонуни конститутсионии Тоҷикистон «Дар бораи интихобот ба Маҷлиси миллии Маҷлиси Олии ҶТ», КМИР Б.Худоёровро ҳамчун узви Маҷлиси миллии Маҷлиси Олии ҶТ ба қайд гирифта, ваколатҳои ӯро тасдиқ намуд.
Интихобот ба ҷойи собиқ узви Маҷлиси миллии Маҷиси Олии Тоҷикистон Нуриддин Сайидов пас аз таъини ӯ ба вазифаи вазири маорифи Тоҷикистон гузаронида шуд.
Айни замон дар Маҷлиси миллии Маҷлиси Олии ҷумҳурӣ боз як ҷой холӣ аст. Аввали соли равон собиқ раиси Дастгоҳи иҷроияи сарвари Давлат Матлубхон Давлатов ба вазифаи муовини аввали нахуствазири Тоҷикистон таъин шуда, аз узвияти Маҷлиси миллӣ хориҷ шуд. Мутобиқи қонунгузорӣ, узви палатаи болоии парлумонро ба ин ҷой президент таъин мекунад.
Қобили зикр аст, ки палатаи болоии парлумони кишвар аз 33 нафар аъзо иборат буда, вакилони маҷлисҳои маҳаллӣ 25 нафар аъзои Маҷлиси миллиро интихоб менамоянд ва 8 нафари дигар бо фармони президенти ҷумҳурӣ таъин карда мешаванд.
Ғайр аз ин, собиқ президентҳои Тоҷикистон агар ихтиёран аз ин ҳуқуқ даст накашанд, метавонанд якумр аъзои Маҷлиси миллӣ бошанд.
Муҳлати ваколати Маҷлиси Олӣ 5 сол аст. Бо анҷоми ин муҳлат интихоботи нав гузаронида мешавад.
