Сардори Хадамоти муҳоҷирати назди Ҳукумати Ҷумҳурии Тоҷикистон Сафиалло Девонаев бо гурӯҳе аз кормандони Хадамоти муҳоҷират ҷиҳати иштирок дар ҷаласаи 11-уми Шӯрои роҳбарони мақомоти муҳоҷирати давлатҳои аъзои Иттиҳоди Давлатҳои Мустақил (ИДМ), Созмони Аҳдномаи Амнияти Дастаҷамъӣ (СААД) оид ба масъалаҳои мубориза бо муҳоҷирати ғайриқонунӣ ва Шӯро оид ба сиёсати муҳоҷират дар Кумитаи ҳамгироии Иттиҳоди АвруОсиё, ки аз 12 то 15 июни соли ҷорӣ баргузор мегардад, ба Федератсияи Россия сафар намуд.
Тавре аз Маркази матбуоти Хадамоти муҳоҷирати назди ҳукумати ҷумҳурӣ хабар доданд, дар ҷаласаи навбатӣ, равандҳои муҳоҷират дар давлатҳои аъзои Иттиҳоди Давлатҳои Мустақил (ИДМ), татбиқи Барномаҳои ҳамкории давлатҳои аъзои Иттиҳоди Давлатҳои Мустаъқил оид ба мубориза бар зидди муҳоҷирати ғайриқонунӣ барои солҳои 2009-2011 ва як қатор масоили дигар баррасӣ хоҳанд гашт.
Дар ҷаласа ҳамчунин масоили вазъи муҳоҷират дар кишварҳои узви ИДМ, таҷрибаи Хадамоти федералии муҳоҷирати Русия оид ба пешниҳоди патент ҷиҳати амалисозии фаъолияти меҳнатӣ, ҷалби муташаккилонаи муҳоҷирон ба кор, назорати реҷаи будубоши онҳо ва ғайра матраҳ мегарданд.
