Чанде қабл дар Вазорати рушди иқтисод ва савдои ҷумҳурӣ мулоқоти вазир Шариф Раҳимзода бо намояндаи Бонки осиёии рушд дар Ҷумҳурии Тоҷикистон хонум Асел Чингишева баргузор гардид.
Тавре аз хадамоти матбуоти Вазорати мазкур хабар доданд, дар мулоқот ба барномаи навбатии сесолаи кӯмаки Бонки осиёгии рушд (БОР) ба Тоҷикистон, ки айни замон мавриди таҳия қарор дорад, таваҷҷуҳи хосса зоҳир гардид.
Дар чаҳорчӯби ин барнома муддати се соли минбаъда БОР ба Тоҷикистон дар ҳаҷми 215, 5 млн. доллари ИМА воситаҳои бурсӣ ҷудо мекунад.
Қаблан намояндагони БОР изҳор карда буданд, ки ин барнома ба ҳалли масоили бештар афзалиятнок оид ба рушди кишвар – дастгирӣ дар барқарор ва эҳёи зербино, беҳбуди таъминот бо барқ, аз ҷумла рушди истифодаи энергияи барқароршаванда ва ҳамчунин дастгирии бахши хусусӣ равона мегардад.
Бино ба маълумоти Вазорати рушди иқтисод ва савдои ҷумҳурӣ, то 1-уми апрели соли равон БОР дар ҳамроҳӣ бо ҳукумати Тоҷикистон дар амалисозии 12 лоиҳаҳо дар бахшҳои гуногуни иқтисод иштирок мекунад, ки маблағи умумии онҳо 510 млн. доллари ИМА-ро ташкил медиҳад. Аз ин миқдор то моҳи апрели соли равон дар ҳаҷми 205 млн. доллари ИМА маблағҳо азхуд карда шудааст.
