Зимни мулоқоти сардори Хадамоти муҳоҷирати назди ҳукумати ҷумҳурӣ Сафиалло Девонаев бо намояндаи бонки русиягии баййниминтақавии «Связь-Банк» Андрей Григорович масъалаҳои роҳандозии ҳамкориҳои дуҷониба баррасӣ шуданд.
Тавре ба ОИ «Азия-Плюс» аз Хадамоти муҳоҷирати ҷумҳурӣ хабар доданд, дар ҷараёни мулоқот Андрей Григорович андешаҳои худро оид ба ҳамкориҳои оянда ва мутақобилан судманди роҳбурдӣ бо Хадамоти муҳоҷират баён дошта, изҳор кард, ки бонк тасмим дорад, дар моҳҳои наздик лоиҳаи Харитаи ягонаро оид ба интиқоли маблағҳо таҳия намоянд. «Аз ин хизматгузорӣ муҳоҷирони кории тоҷик метавонанд истифода кунанд», – гуфт ӯ.
Ҳамчунин намояндаи бонки Русия зикр кард, ки айни замон масъалаи ифтитоҳи намояндагии «Связь-Банк» дар Тоҷикистон мавриди омӯзиш қарор дорад.
Ба иттилои манбаъ, зимни вохӯрӣ ҳамчунин атрофи масъалаи иштироки бонки русиягӣ дар таъмиру азнавсозии бинои Маркази таълимии муҳоҷирони кории тоҷик табодули афкор сурат гирифт.
