Судяи Суди олии Тоҷикистон Нур Нуров аз мансабаш бозхоста шуд. Дар иҷлосияи имрӯзаи Маҷлиси миллии Маҷлиси Олии ҶТ аъзои палатаи болоии парлумони кишвар ин пешниҳоди сарвари давлат Эмомалӣ Раҳмонро маъқул шумориданд.
Қаблан аъзои Маҷлиси миллӣ бо дархости Прокуратураи генералӣ ӯро аз дахолатнопазирӣ низ маҳрум намуда, барои ба ҷавобгарии ҷиноятӣ кашилдани ӯ розигӣ доданд.
Дархости ба ҷавобгарӣ кашидани Нур Нуров ва дар сурати зарурат ба ҳабс гирифтани ӯ аз ҷониби Прокурори генералӣ пешниҳод гардид.
Аз ин пештар Н.Нуров ба Агентии зиддифасод ба сифати шоҳид оид ба парвандаи «исфарагиҳо» ба бозпурсӣ даъват шуда буд.
Нур Нуров собиқаи 30-солаи корӣ дошта, аз моҳи июли соли 2008 то моҳи июни соли 2009 дар мурофиаи судӣ нисбат ба 33 нафар сокинони ноҳияи Исфрара дар робита ба парвандаи собиқ директори корхонаи кимиёи Исфара ва вакили Маҷлиси вакилони халқи вилояти Суғд Низомхон Ҷӯраев иштирок карда буд.
Пас аз содир шудани ҳукм нисбат ба 33 нафар сокинони ноҳияи Исфара собиқ прокурори генералии Тоҷикистон Бобоҷон Бобохонов ба он эътироз оварда, онро ғайримунсифона арзёбӣ кард.
Парвандаи мазкур дар васоити ахбори умуми ватанӣ ва хориҷӣ ба таври густарда инъикос гардид ва ҳатто се нафар судяҳо, аз ҷумла Нур Нуров низ аз болои чанде аз нашрияҳо шикоят бурда, онҳоро дар инъикоси таҳрифомези қазия айбдор ва дар ҳаҷми 5 млн. сомонӣ ҷуброни маънавӣ талаб карданд.
Акнун пас аз бозгашти Низомхон Ҷӯраев аз Маскав тафтишоти парвандаи мазкур идома ёфта, дар он ҳолатҳои нав рӯйи кор омаданд.
