Кормандони мақомоти ҳифзи ҳуқуқи вилояти Хатлон ба гумони даст доштан дар муомилоти ғайриқонунии маводи мухаддир хизматчии ҳарбии қисми низомии 2610-и Сарраёсати КДАМ мустақар дар ноҳияи Панҷро боздошт намуданд. Аз боздоштшуда ҳудуди 380 кило маводи мухаддир мусодира шудааст.
Тавре ба ОИ «Азия-Плюс» як манбаъ аз мақомоти ҳифзи ҳуқуқ хабар дод, боздоштшуда Суҳроб Файзалиев қаблан ин ҷиноятро тарҳрезӣ намуда, чандин маротиба дар бораи сана ва вақти гирифтани маводи мухаддир бо сокини Афғонистон гуфтушунид кардааст.
«Хизматчии ҳарбӣ шаби 22-юми июл дар марз боздошт гардид. Ҳангоми кофтукови автомашинаи ӯ 8 адад халта ва як адад қуттии дорои 21,6 кило маводи мухаддири героин, 37 кило афюн ва 320 килову 860 грамм ҳашиш дарёфт ва мусодира карда шуд, ки вазни умумии он беш аз 379 килоро ташкил дод», – гуфт манбаъ.
Нисбат ба ин аъмоли марзбон мутобиқи якчанд моддаи Кодекси ҷиноии ҶТ, аз ҷумла муомилоти ғайриқонунии маводи нашъаовар, қочоқ, убури ғайриқонунии марз парвандаи ҷиноӣ боз шудааст.
Санаи 27-уми июл суди гарнизони вилояти Хатлон барои ҳабси Суҳроб Файзалиев иҷозатнома дод.
Зикр гардид, ки боздоштшуда ба гуноҳи худ иқрор шуда, аз кардааш пушаймон аст. Тафтишоти пешакӣ аз рӯйи ин далел идома дорад.
