Дар минтақаи шимоли ҷумҳурӣ бар асари садамаҳои нақлиёт 6 тан ба ҳалокат расиданд.
Тавре ба ОИ «Азия-Плюс» аз Раёсати ВКД ҶТ дар вилояти Суғд хабар доданд, рӯзи якшанбе дар роҳи мошингарди Душанбе-Хуҷанд-Чаноқ автомашинаи тамғаи «BMW» таҳти идораи сокини 24-солаи шаҳраки Пролетари ноҳияи Ҷаббор Расулов Далер Умаров ба автомашнаи боркаши КАМАЗ бархӯрда, дар натиҷа ронандаи автомашинаи сабукрав ва мусофирони он – Нусрат Давронови 32-сола ва Зарнисор Темирови 17-сола дар ҷойи ҳодиса ба ҳалокат расиданд.
Дар садамаи дигар дар ноҳияи Бобоҷон Гафуров боз як нафар фавтид. Дар ин садама автомашинаи «Мерседес-Бенс» таҳти идораи сокини 25-солаи ин ноҳияи Ҳотам Холматов аввал ба автомашинаи «БМВ» таҳти идораи сокини 22-солаи вилояти Ботканди Қирғизистон Шерзод Бобораҳимов ва сипас ба автомашинаи тамғаи «Опел-Вектра» таҳти идораи Ҳалим Саидмуродови 41-сола бархӯрда, дар натиҷа ронандаи «Опел» ва мусофири он ҷароҳат бардоштаанд. «Мусофири «Мерседес» Ғулом Нишонов дар бемористон ба ҳалокат расида, ронандаву мусофирони «БМВ» осеб надидаанд», – гуфтанд дар раёсат.
Бино ба маълумоти Шуъбаи Бозрасии давлатии автомобилии Раёсати ВКД ҶТ дар вилояти Суғд, дар зарфи 8 моҳи соли равон дар роҳҳои шаҳру навоҳии минтақаи шимоли ҷуммҳурӣ 207 ҳодисаи садамаи нақлиёт (ҳамин давраи соли гузашта – 222 ҳодиса) ба қайд гирифта шуда, дар натиҷа 97 нафар ҳалок (соли 201 – 104 нафар) ва 218 тан (соли 2011 – 225 тан) ҷароҳатҳои гуногун бардоштанд.
