Ба туфайли ҷарроҳии шоми рӯзи чоршанбе, журналисти бахши форсии хабаргузории Би-Би-Сӣ Искандари Фирӯз аллакай баъди се рӯз метавонад бо пойҳои худ роҳ гардад.
Бино ба иттилои сомонаи расмии дармонгоҳи «Ибни Сино», ҷарроҳӣ муддати чор соат ҷараён гирифта, он аз ҷониби табиби эронӣ Нодир Муталлибзода ва кӯмаки табибони тоҷик анҷом дода шудааст. Ҷарроҳии пойҳои журналист пас аз 50 рӯзи садамаи нақлиёт ва ҷароҳати вазнин бардоштани ӯ баргузор шуд.
Ёдрас мекунем, ки шоми рӯзи 9-уми октябр ҳангоми ҳаракат дар хиёбони Исмоили Сомонӣ ронандаи автомашинаи тамғаи «Тойота-Ландкурузер» Айёмиддин Раҳмиддинзодаи 22-сола аз уҳдаи идораи воситаи нақлиёт набаромада, ба самти муқобили ҳаракати роҳ баромада, ба автомашинаи тамғаи «Тойота-Камри» таҳти идораи ҳамсоли худ Ҷавоншери Фирӯз бармехӯрад. Бар асари ин бархӯрд ду мусофири автомашинаи «Тойота-Ландкрузер», ронандаи автомашинаи «Тойота-Камри» ва мусофири он – журналисти 46-солаи хадамоти форсии хабаргузории ВВС Искандари Фирӯз ҷароҳатҳои гуногуни ҷисмонӣ бардошта, дар беморхона бистарӣ шуданд.
Айни замон парвандаи ҷиноӣ оид ба далели садамаи нақлиёт, ки дар он журналисти хабаргузории ВВС Искандари Фирӯз ҷароҳат бардошт, ба Прокуратураи генералӣ ирсол шудааст. Парвандаи ҷиноӣ нисбати айбдоршаванда Насрулло Шарифов мутобиқи моддаи 212, қ. 2-и КҶ ҶТ (Вайрон кардани қоидаҳои ҳаракатӣ роҳ ва истифодаи воситаҳои нақлиёт) боз шудааст. Айбдоршаванда ҳанӯз соли 2008 барои дар садама ба ҳалокат расидани ҷабрдида тибқи ин модда ба ҷазои се соли сукунати озод маҳкум шуда буд.
Дар ҳамин ҳол, ташхиси воситаи нақлиёт хисороти ба он расидаро дар ҳаҷми 20 ҳазору 363 сомонӣ (ҳудуди 4,3 ҳазор $) муайян карда, маблағи табобати журналист дар Маркази миллии тиббӣ 17 ҳазору 352 сомонӣ (беш аз 3,6 ҳазор $) ва 12 рӯз дар дармонгоҳи «Ибни Сино» 8 ҳазору 157 сомонӣ (1,7 ҳазор $)-ро ташкил додааст.
Ҷониби ҳимояи журналист ният доранд, ки пас аз содир шудани ҳукми суд барои ҷуброни хисороти моливу маънавӣ аризаи даъвогӣ пешниҳод намоянд.
