Беш аз 100 нафар шаҳрвандони Тоҷикистон дар Маркази нигоҳдории шаҳрвандони хориҷии №1-и Сарраёсати ВКД Русия дар шаҳри Маскав қарор доранд.
Бино ба маълумоти хадамоти матбуоти намояндагии Хадамоти муҳоҷирати назди ҳукумати ҶТ дар Русия, чанде қабл корманди хадамот Азиз Халилов аз маркази мазкур боздид намуда, дар мулоқот бо муовини сардори марказ Алексей Смиронв маълум шудааст, ки айни замон дар инҷо 111 нафар шаҳрвандони Тоҷикистон қарор доранд.
Ба иттилои манбаъ, аксари онҳо барои нақзи қоидаҳои вуруд ба Русия ё реҷаи будубош дар ин кишвар ба ҷавобгарӣ кашида шудаанд.
«Корманди хадамот бо шаҳрвандони Тоҷикистон мулоқот орост. Онҳо бо хӯроки севақта дар як рӯз ва ҳаммом дар як ҳафта ду маротиба таъмин мебошанд», – гуфтанд дар намояндагии хадамот.
Гуфта мешавад, А.Смирнов ҷиҳати мусоидат ба ҳарчӣ зудтар ба ватан фиристодани шаҳрвандони Тоҷикистон ваъда додааст.
