То ҳанӯз кормандони шуъбаи КДАМ дар ноҳияи Қумсангир сабти видеоии маросими дафни рӯҳонии маъруф Домулло Муҳаммадии Қумсангириро ба журналисти ҷавон Далер Шарифов барнагардонидаанд.
Ахиран Далер Шарифов дар бораи ин рӯҳонӣ мавод омода мекард. Дар маросими дафн низ ӯ сабти видеоӣ кард, ки онро дар маводи худ минбаъд истифода карданӣ буд, вале пас аз анҷоми маросими дафн кормандони шуъбаи КДАМ-и ноҳия ӯро муддати як соат бозпурсӣ карда, сабти видеоиашро гирифтаанд.
Дар суҳбат бо хабарнигори ОИ «Азия-Плюс» журналист изҳор кард, ки ба ӯ баргардонидани сабти видеоӣ пас аз тамошои онро ваъда кардаанд, аммо аз он рӯз аллакай як моҳ сипарӣ мешавад.
«Қисмати зарурии сабти видеоӣ барои маводро аз наворбардорони дигар дастрас кардем, вале ман то ҳол ҳайронам, ки чаро аз миёни издиҳоми ҳазорнафара танҳо маро барои бозпурсӣ даъвт карданд, зеро ба ҷуз ман маросими дафнро боз 6 нафар наворбардорони касбӣ ва беш аз 100 нафар дар телефонҳои ҳамроҳашон низ сабт намуданд», – мегӯяд рӯзноманигор.
Ёдрас мекунем, ки маросими дафнии Домулло Муҳаммади Қумсангирӣ санаи 22-юми ноябр баргузор шуд. Ӯ дар кори истиқрори сулҳ ва ризояити миллӣ дар Тоҷикистон саҳми беандоза дорад.
Далер Шарифов собиқ корманди шабакаи телевиизионии «Сафина» ва пешвои ташкилоти ҷамъиятии сабтиномнашудаи «Қадам ба қадам» мебошад. Ӯ ба тамошобинон бо барномаҳои мубоҳисавии «Муошират» ва «Қатрае аз баҳр» шинос аст. Моҳи майи соли равон Шарифов аз ҷониби афроди номаълум мавриди лату кӯб қарор гирифта буд. Ин афрод то ҳол муайян карда нашудаанд.
