Аз ширкати «Барқи тоҷик» дар робита ба иттилои қаблан пахшшуда дар бораи
ахири сол оғоз шудани
интиқоли гармиву оби гарм ба корхонаву муассисаҳо ва аҳолии пойтахт хабар доданд, ки Маркази барқу гармидиҳии Душанбе интиқоли онро аз 12-уми ноябр шурӯъ кардааст.
Ба қавли сухангӯи ширкат Нозирҷон Ёдгорӣ, айни замон оби гарм ва гармӣ ба хонаҳо танҳо аз дегхонаи шарқӣ интиқол дода шуда, маркази маъмурии пойтахт ва ноҳияву манотиқи ба ин шоҳроҳи лӯла пайваст бо он таъминанд.
Ба гуфтаи вай, дегхонаи ғарбӣ ахири соли равон, тахминан 25-уми декабр ба фаъолият шурӯъ мекунад. «Айни замон Маркази барқу гармидиҳӣ ҳамарӯза 30 МВТ нерӯи барқ ва 204 тонна буғ истеҳсол мекунад. Бо оғози фаъолияти дегхонаҳои ғарбӣ ширкат ба кадом ноҳияву манотиқ интиқол додани оби гарму гармиро хабар хоҳад дод», – афзуд Ёдгорӣ.
