Ахири ҳафтаи гузашта дар Хадамоти муҳоҷирати назди ҳукумати ҶТ оид ба масъалаи ҷамъбасти фаъолият дар соли 2012 ва вазифаҳо барои соли 2013 ҷаласаи ҳайати мушовараи Хадамот баргузор гардид.
Тавре аз шуъбаи робита бо ҷомеаи Хадамоти мазкур иттилоъ доданд, дар кори ҷаласа намояндагони Дастгоҳи иҷроияи президенти кишвар, мақомоти раҳбарии Хадамоти муҳоҷират ва роҳбарони бахшҳои минтақавии он ширкат варзиданд.
Ба иттилои манбаъ, мудири Бахши муҳоҷирати меҳнатии Шӯъбаи шуғл ва ҳифзи иҷтимоии аҳолии Дастгоҳи иҷроияи сарвари давлат Исматов Нуриддин зимни суханрониаш аз омору арқом ва шумораи нодурусти баъзе ташкилотҳои ғайридавлатӣ, ки дар соҳаи муҳоҷират кору фаъолият доранд ва ҳангоми пешниҳоди маълумотҳо ба хатогиҳо роҳ медиҳанд, изҳори тааҷҷуб кард.
«Иштирокдорони ҷаласа ҳамчунин доир ба тақвияти ҳамкориҳо бо субъектҳои хоҷагидор, беҳтар намудани самтҳои фаъолияти Хадамоти муҳоҷират бо диаспораҳо танзими раванди муҳоҷират, буду боши муҳоҷирони меҳнатӣ дар хориҷи кишвар, ҳифзи ҳуқуқу манфиатҳои онҳо, ҷустуҷӯ ва кашфи бозори меҳнати кишварҳои аврупоӣ ва арабӣ, омӯзиши забонҳои русӣ, англисӣ ва арабӣ, касбомӯзии муҳоҷирони меҳнатӣ, тавсеаи равобит бо ҳамватанони бурунмарзӣ ва ҷалби онҳо ба рушди иқтисодиёти мамлакат, назорати риояи қонунгузории амалкунанда аз ҷониби муҳоҷирони меҳнатӣ ибрози андеша карданд», – гуфт манбаъ.
