Тӯли солҳои истиқлолият дар Тоҷикистон 282 адад нерӯгоҳи хурди барқӣ бо иқтидори умумии 25,2 ҳазор кВт мавриди истифода қарор гирифт.
Бино ба маълумоти Вазорати энергетика ва саноати ҷумҳурӣ, соли гузашта дар ҷумҳурӣ 17 адад нерӯгоҳи хурди барқӣ бо иқтидори умумии 1,9 ҳазор кВт ба истифода дода шуда, маблағи умумии хароҷоти бунёди он 14,7 млн. сомонӣ (3,08 млн. $)-ро ташкил дод.
«Аз 17 нерӯгоҳи хурдии барқии соли гузашта бунёдёфта 3-тоаш аз ҳисоби буҷетҳои маҳаллӣ ва бурсҳо ва 14-тоаш аз ҳисоби сармоягузории хусусии маҳаллӣ сохта шуданд», – гуфтанд дар вазорат.
Ба иттилои манбаъ, то соли 2015 дар Тоҷикистон мавриди истифода қарор гирифтани боз 70 нерӯгоҳи хурди обиву барқӣ дар назар аст. «Феълан сохтмони 14 нерӯгоҳи хурди барқӣ бо иқтидори умумии беш аз 16 ҳазор кВт идома дошта, 11-тои онҳо аз ҳисоби бурсҳо ва 3-тоаш аз ҳисоби сармоягузорони маҳаллӣ маблағгузорӣ шудаанд», – гуфт манбаъ.
Зимнан зикр гардид, ки барои озмоиши истифода аз сарчашмаҳои алтернативии энергия дар манотиқи кишвар 9 адад дастгоҳҳои истеҳсоли нерӯи барқи бодӣ (шамолӣ) бо иқтидори умумии 5 кВт ва 2,7 ҳазор адад дастгоҳҳои истеҳсоли нерӯи барқ аз офтоб насб шудаанд.
