Соли гузашта дар минтақаи шимоли ҷумҳурӣ барои порадиҳӣ ба кормандони Раёсати Агентии назорати давлатии молиявӣ ва мубориза бо коррупсияи вилояти Суғд ду нафар соҳибкорон боздошт шуданд.
Сардори Раёсати мазкур Ҳусейн Оқилов зимни нишасти хабарӣ изҳор намуд, ки директори ҶДММ «Хизмат-Сервис»-и ноҳияи Исфара А.Б. зимни пешниҳоди пора дар ҳаҷми 5 ҳазор доллари ИМА ва директори кооперативи истеҳсолии «Овчӣ-Ғончӣ» Ш.М. зимни додани пора ба маблағи 4 ҳазор доллари ИМА ба кормандони раёсат бо далелҳои шайъӣ боздошт шудаанд.
Бино ба маълумоти Раёсати Агентии назорати давлатии молиявӣ ва мубориза бо коррупсияи вилояти Суғд, соли 2012 дар қаламрави минтақаи шимоли кишвар 29 далели гирифтани пора аз ҷониби шахсони мансабдор (соли 2011 – 32 далел) ва 2 ҳодисаи пешниҳоди пора ба онҳо ба қайд гирифта шудааст.
