Ахири ҳафтаи гузашта бо дархости ширкати «Барқи тоҷик» бинобар сабаби ошкор шудани нуқсу камбудиҳои техникӣ дар генератори синтези газ аз ангишти маҳаллӣ, дар дегхонаи шарқии Маркази барқу гармидиҳии Душанбе истеҳсоли гармӣ қатъ гардид.
Тавре ба ОИ «Азия-Плюс» як манбаъ аз мақомоти шаҳрдории пойтахт хабар дод, дар ин робита раиси шаҳри Душанбе Маҳмадсаид Убайдуллоев қарореро ба имзо расонид, ки муофиқи он дар иншооти мазкур корҳои таъмир оғоз гардиданд.
Ёдрас мекунем, ки ахири соли 2012 Корхонаи алюминии тоҷик (ТАЛКО) ба Маркази барқу гармидиҳии Душанбе ду адад генератори синтези газ аз ангишти маҳаллӣ пешниҳод кард ва айни замон насби ин генераторҳо дар дегхонаи шарқии МБД Душанбе ба итмом расидааст.
Роҳбари департаменти иттилоотиву таҳлилии ТАЛКО Игор Сатторов он замон изҳор намуда буд, ки насби ин генераторҳо имкон медиҳад, ки як қатор иншооти қисмати шарқии пойтахт бо гармиву оби гарм таъмин карда шаванд. «Барои таъмини кори мунтазами генераторҳо дар мавсим 3 ҳазор тонна ангишт зарур аст», – гуфта буд вай.
Номбурда ҳамчунин гуфта буд, ки бо назардошти хароҷоти кашонидани ангишт то ҷойи истифода, маблағи умумии истифодабарии онҳо дар як мавсим 300 ҳазор доллари ИМА-ро ташкил хоҳад дод, ки аз сарфакории ин дастгоҳҳо гувоҳӣ медиҳад.
