Ба унвони роҳбари намояндагии Хадамоти муҳоҷирати назди ҳукумати ҶТ дар Русия Асрор Одинаев аз мақомоти раҳбарии хоҷагии деҳқонӣ (фермерӣ)-и вилояти Волгоград ҷиҳати ниёз доштан ба кормандони бахши кишоварзӣ дархости расмӣ расидааст.
Тавре ба ОИ «Азия-Плюс» сухангӯи намояндагии ХМ ҶТ дар Русия Иброҳим Аҳмадов хабар дод, хоҷагии деҳқонии вилояти Волгоград ҷиҳати мусоидат ба сафарбар намудани як гурӯҳ коргарон аз ҳисоби шаҳрвандони Тоҷикистон ба сифати механизаторон ва коргарони ёрирасон дархост намуда, пардохти маблағи сафар ба Русия ва таъмини коргарон бо манзили зисту маводи ғизоиро кафолат додааст.
«Ба намояндагӣ аз вилояти Тамбов ва як қатор ширкатҳои сохтмонии шаҳри Маскав низ ба ин монанд дархостҳо ворид гардида, шурӯъ аз оғози сол бошад, аз субъектҳои хоҷагидории Русия ҷиҳати ниёз доштан ба ҳазорон нафар коргарони касбҳои гуногун дархостномаҳо расидаанд», – зикр кард манбаъ.
Ба қавли Аҳмадов, шаҳрвандоне , ки хоҳиши дар Русия кор карданро доранд, барои дастрас кардани маълумоти муфассал дар ин хусус, метавонанд ба Хадамоти муҳоҷирати назди ҳукумати ҶТ муроҷиат намоянд.
