Президенти Эрон Маҳмуди Аҳмадинажод дар маросими мавриди баҳрабардорӣ қарор додани агрегати дуюми нерӯгоҳи «Сангтӯда-2», ки дар таҷлили ҷашни Наврӯз дар назар аст, ширкат хоҳад варзид. Дар ин бора IRIB World Service бо истинод ба вазири энергетикаи Эрон Маҷиди Номҷӯ хабар медиҳад.
Ёдрас мекунем, ки 5-уми сентябри соли 2011 бо иштироки сарони кишварҳои Тоҷикистону Эрон Эмомалӣ Раҳмон ва Маҳмуди Аҳмадинажод маросими мавриди истифода қарор гирифтани агрегати авали нерӯгоҳи «Сангтӯда-2» доир гардида буд.
Мавриди зикр аст, ки сохтмони нерӯгоҳи обӣ-барқии «Сангтӯда-2» ҳанӯз замони шӯравӣ оғоз гардида, минбаъд иҷрои корҳо дар он ба иллати камбуди маблағ ва ҳамчунин оғози ҷанги шаҳрвандӣ дар Тоҷикистон боздошта шуда буданд ва сипас соли 2006 бо дастгирии Эрон ба иҷрои корҳои насбу сохтмон дар он идома бахшида шуд.
Тавре пешбинӣ мегардад, иқтидори нерӯгоҳи «Сангтӯда-2» ба истеҳсоли 1 млрд. кВт/соат нерӯи барқ дар як сол баробар хоҳад буд. Пас аз мавриди истифода қарор гирифтани он дар муддати 12,5 сол он моликияти Эрон хоҳад буд ва сипас пурра ба ихтиёри Тоҷикистон супурда мешавад.
