Бино ба маълумоти расмӣ, тайи 24 рӯзи моҳи феврали соли равон ба Тоҷикистон ягон литр бензин ворид карда нашудааст.
Аз 1 то 24-уми феврал ба Тоҷикистон 13 ҳазору 773 тонна маҳсулоти нафтӣ ворид гардидааст, ки аз он 9,4 ҳазор тоннаашро сӯзишворӣ барои ҳавопаймоҳо, 1,7 ҳазор тоннаашро сӯзишвории дизелӣ, 1,1 ҳазор тоннаашро мазут, 932 тоннаашро битум ва 540 тоннаашро равғанҳои молиданӣ ташкил додаанд.
Тибқи ҳисобҳо, талаботи моҳонаи Тоҷикистон ба бензин ба ҳисоби миёна ҳудуди 49 ҳазор тоннаро ташкил медиҳад ва ин ҳам дар ҳолест, ки бино ба маълумоти Вазорати энергетика ва саноат, моҳи январ ба Тоҷикистон ҳамагӣ 9 ҳазор тонна бензин ворид карда шудааст. Аз куҷо ворид шудани 40 ҳазор тонна боқимондаро метавон тахмин кард.
Тибқи маълумоти Хадамоти гумруки Тоҷикистон, ҳамарӯза аз 300 то 350 адад мошинҳои боркаши дорои маҳсулоти нафтӣ кӯшиш мекунанд, ки ғайриқонунӣ марзи Тоҷикистону Қирғизистонро убур намоянд.
Ахири соли 2010 Русия боҷи содиротӣ ба маҳсулоти нафтии худ барои Қирғизистонро бекор намуда, имрӯз 1 тонна сӯзишвории Русия дар кишвари ҳамсоя нисбат ба Тоҷикистон 300 доллари ИМА арзонтар аст.
Қобили зикр аст, ки аввали моҳи феврали соли ҷорӣ миёни Тоҷикистону Русия дар бораи таҳвили маҳсулоти нафтии Русия ба Тоҷикистон дар ҳаҷми 1 млн. тонна дар як сол бидуни пардохти боҷи содиротӣ созишнома ба имзо расид, вале он ҳоло мавриди амал қарор нагирифтааст. Бино ба маълумоти ахир аз мақомоти дахлдор, созишнома ҳатто моҳи март ҳам шояд мавриди амал қарор нагирад.
