Прокурори вилояти Суғд Шариф Қурбонов зимни нишасти хабарӣ иттилоъ дод, ки 58 нафар сокинони вилоят ба фаъолият дар созмону гурӯҳҳои ифротгаро даст доранд.
Ба гуфтаи ӯ, нимсолаи аввали соли равон мақомоти прокуратураи вилоят дар ҳамдастӣ бо дигар мақомоти ҳифзи ҳуқуқ робитаи 58 нафар сокинои вилоятро бо фаъолияти ҳаракатҳои ифротгарое чун «Ансоруллоҳ» ва «Ҷундуллоҳ» ошкор сохт.
«Нисбати 28 нафар аз ин шумор парвандаҳои ҷиноӣ боз шуда, ба суд ирсол гардиданд, 30 нафари боқимонда ба ҷустуҷӯи байнулмилалӣ эълон шуда, як узви ҷамъияти «Ансоруллоҳ» дар Қирғизистон боздошт шуд», – иброз дошт прокурори вилоят.
Ӯ ҳамчунин зикр кард, ки дар ҳамин давраи соли гузашта ба гумони узвият дар созмону ҳизбҳои ифротгаро нисбати 56 тан аз сокинони вилоят парвандаҳои ҷиноӣ боз шуда, 54 нафар ба фаъолият дар Ҳаракати исломии Ӯзбекистон ва 2 нафар дар «Ҳизб-ут-Таҳрир» даст доштанд.
