Системаи канализатсионии маркази ноҳияи Абдураҳмони Ҷомӣ баъди қабул шудани нақшаи генералии ноҳия ва барномаи рушди ноҳия барои солҳои 2013-2017 имкони барқароршавиро дорад.
Тавре раиси ноҳияи Абдураҳмони Ҷомӣ Акрам Сулаймонов зимни нишасти хабарӣ 22–юми июл иброз дошт, нақшаи генералии ноҳия дар омӯзиши ҳукумати ҷумҳурӣ қарор дорад.
«Айни замон нақшаи генералии ноҳия дар марҳилаи омӯзиши ҳукумати кишвар қарор дошта, дар доираи он пас аз тасдиқшавӣ системаи канализатсионии маркази ноҳия, ки баъди солҳои 90-ум ба куллӣ аз байн рафтааст, пурра барқарор хоҳад шуд», – гуфт Сулаймонов.
Ба гуфтаи ӯ, тайи солҳои охир бо сабаби набудани нақшаи генералӣ ва барномаи рушди ноҳия аз ҳисоби буҷаи давлат барои сохтмони иншоотҳои муҳим маблағҳои ночиз ҷудо мешуданд. Аммо из ин пас, дар сурати тасдиқ ёфтани барномаи рушди ноҳия сохтмон ва азнавсозии объектҳои зарурӣ имконпазир мегардад.
