30 нафар донишӯёни Донишгоҳи давлатии Кӯлоб, ки дар гурӯҳҳои буҷетӣ таҳсил кардаву соли гузашта муассисаи таълимиро хатм намуданд, аз ҳозир шудан ба ҷойи кор тибқи роҳхат саркашӣ кардаанд.
Чӣ тавре ки ба ОИ «Азия-Плюс» ректори донишгоҳ Абдулло Табаров хабар дод, дар ин робита аз болои донишҷӯён ба мақомоти судӣ аризаи даъвогӣ пешниҳод гардида, аз 18 нафар донишҷӯён ба маблағи умумии 55 ҳазору 430 сомонӣ маблағи таҳсил рӯёнида шудааст ва нисбати донишҷӯёни боқимонда баррасии парвандаҳо идома дорад.
Ба гуфтаи ӯ, соли равон 1 ҳазору 108 нафар донишҷӯён ба имтиҳоноти давлатӣ роҳ дода шуда, 1 ҳазору 63 нафари онҳо имтиҳонотро муваффақаона супурданд. «Ҳамаи онҳо роҳхат гирфта, моҳи сентябр маълум хоҳад шуд, ки чанд нафар аз гурӯҳҳои буҷетӣ ба ҷойи кори сафарбаршуда ҳозир шудаанд», – зикр кард ӯ.
Қобили зикр аст, ки дар Донишгоҳи давлатии Кӯлоб 8 факултаи рӯзона ва ғоибона оид ба 38 ихтисос амал мекунад. Шумори донишҷӯён айни замон 6 ҳазору 271 нафарро ташкил медиҳад. , Аз ҷумла ҳудуди 3,5 ҳазор нафар дар шуъбаи рӯзона, 3 ҳазору 757 нафар дар гурӯҳҳои буҷетии ҳарду шуъба ва тибқи квотаи президентӣ 296 нафар (175 нафар духтарон) таҳсил доранд.
