Ҷаласаи судӣ оид ба баррасии парвандаи маҳбусон Суннатулло Ризоев ва Садриддин Тошев дар Хуҷанд бинобар сабаби ба кор дар ВМКБ таъин шудани раисикунанда дар ин мурофиа, судяи суди шаҳр Муслумон Шарифов аз нав оғоз мегардад. Дар ин бора ба ОИ «Азия-Плюс» раиси суди шаҳри Хуҷанд Матлуба Ҳабибуллоева хабар дод.
«Мо судяи суди шаҳр Улуғбек Мустафоқуловро раиси ин мурофиа таъин намудем. Мурофиа ҳамин ҳафта таъин шуда, вале санаи дақиқаш маълум нест. Чун судя бо парванда хуб шинос нест, баррасии парвандаи маҳбусон аз нав оғоз мегардад», – зикр кард М.Ҳабибуллоева.
Ёдрас мекунем, ки 24-уми июли соли равон, дар минтақаи шимоли ҷумҳурӣ мурофиаи додгоҳӣ нисбат ба маҳбусони муассисаи ислоҳии низомаш шадиди ЯС 3/3-и шаҳри Хуҷанд Суннатулло Ризоев ва Садриддин Тошев пушти дарҳои пӯшида оғоз гардид.
Санаи 1-уми августи соли равон маҳбус Садриддин Тошев ва адвокати ӯ Файзинисо Воҳидова иштирок дар мурофиаи судиро
рад карданд.
Тошев ва Ризоев дар қатори як гурӯҳ маҳбусон тирамоҳи соли гузашта пас аз марги маҳбус Ҳамза Икромзода аз муассисаи ислоҳии №1-и Душанбе ба муассисаи ислоҳии шаҳри Хуҷанд интиқол дода шуданд.
