Дар робита ба пешбарии номзадии Ойниҳол Бобоназарова ба мансаби президентӣ аз ҷониби Иттиҳоди нерӯҳои ислоҳотхоҳи Тоҷикистон раиси Ҳизби коммунисти Тоҷикистон, вакили МНМО ҶТ Шодӣ Шабдолов изҳор намуд, ки Бобоназарова ҳамеша дорои мавқеи сиёсии худ буда, бо андешаҳои ғайритундгароёна фарқ мекунад.
Ба андешаи раиси ҲКТ, миёни ҳаракатҳои гуногуни сиёсӣ Бобоназарова ҳеҷ гоҳ калаванда набуда, нисбати ҳукумати кунунӣ аз рӯи аксари масоил назари танқидӣ дорад ва бо ин сабаб аз ҷониби мақомоти раҳбарии кишвар хуш пазируфта намешавад. «Номзадии Бобоназарова ба президенти амалкунандаи ҷумҳурӣ алтернативаи ҷиддӣ шуда метавонад», – гуфт ӯ.
Дар идома Шабдолов зикр кард, ки сарфи назар аз ин, Ҳизби коммунисти Тоҷикистон аз номзадии Бобоназарова пуштибонӣ карданӣ нест. «Мо дар интихобот бо барнома ва номзади худ иштирок мекунем», – афзуд раиси ҲКТ.
Ёдрас мекунем, ки
қаблан
раиси ҲКТ ба ОИ «Азия-Плюс» хабар дода буд, ки дар интихоботи президентӣ Ҳизби коммунисти Тоҷикистон бо аҳзоби сиёсии дигар ба эътилоф ворид намешавад. «Ҳизб ҳамчунин номзади ягона аз дигар ҳизбҳои сиёсӣ ба мансаби президентиро низ дастгирӣ карданӣ нест», – иброз дошта буд Шабдолов.
