Аввали ҳафтаи равон дар Созмони Милали Муттаҳид бо ибтикори Намояндагии доимии Ҷумҳурии Тоҷикистон дар СММ ва ҳамкории Маркази байналмилалии идоракунии хатарҳо ва офатҳои марбут ба об (International Center on Water Hazard and Risk Management, ICHARM/UNESCO) нишасти Гурӯҳи “Дӯстони об” баргузор гардид.
Бино ба иттилои Вазорати корҳои хориҷии ҶТ, нишастро Намояндаи доимии Тоҷикистон ифтитоҳ намуда, қайд кард, ки мақсад аз баргузор намудани чорабинии мазкур пайгирии пешниҳоди Президенти Ҷумҳурии Тоҷикистон Эмомалӣ Раҳмон ҷиҳати мунтазам муҳокима кардани масъалаҳои марбут ба офатҳои табиии вобаста ба захираҳои обӣ, ки зимни суханронии ӯ ҳангоми маросими ифтитоҳи Конфронси байналмилалии сатҳи баланд оид ба ҳамкорӣ дар соҳаи об 20 августи соли 2013 эълом гашта буд, мебошад.
Ба иттили манбаъ, роҳбари Маркази байналмилалии мудирияти хатарҳо ва офатҳои марбут ба об доктор Кензо Ҳирокӣ таъкид кард, ки масъалаи офатҳои табиии вобаста ба об ва таҳкими ҳамкории байналмилалӣ ва минтақавӣ дар ин соҳа аз ҷониби ширкаткунандагони Конфронси Душанбе дастгирӣ ёфта, дар санади ниҳоии он ҳамоиш низ бозтоб ёфтааст. Аз ин лиҳоз, пешниҳод гардид, ки масъалаи мазкур дар чаҳорчӯби Маҷмаи Умумии СММ ба таври мунтазам мавриди муҳокима қарор дода шавад. Ба ин мақсад, К. Ҳирокӣ даъват кард, ки ҷиҳати пайгирии масъалаи мазкур лоиҳаи қатъномаи дахлдори МУ СММ таҳия гардад.
Гуфта мешавад, намояндагони доимӣ ва сафирони Афғонистон, Танзания, Намибия, Ямайка, Ҷумҳурии Доминикан ва Кабо Верде дар СММ, ки дар Конфронси Душанбе ширкат карда буданд, иқдоми ҷониби Тоҷикистонро дар масъалаи таҳкими ҳамкорӣ дар соҳаи идоракунии офатҳои табиии марбут ба об дастгирӣ намуданд.
Зимнан зикр мегардад, ки дар хотимаи нишасти Гурӯҳи “Дӯстони об” С. Аслов хабар дод, ки ба манзури муаррифӣ намудани натиҷаҳои Конфронси байналмилалии сатҳи баланди Душанбе, Намояндагии доимии Тоҷикистон 25 сентябри соли ҷорӣ дар чаҳорчӯби мубоҳисаҳои умумии 68-умин иҷлоси Маҷмааи Умумӣ ҷаласаи махсусро таҳти раёсати Сарвазири кишвар Оқил Оқилов баргузор хоҳад кард.
