Намояндагони гурӯҳи ташаббускори номзади пешбаришуда аз ҲНИТ ба мақоми президентӣ Ойниҳол Бобоназарова, ки аз ҷониби ИНИТ низ дастгирӣ ёфт, то имрӯз ба ҷонибдории ӯ беш аз 175 ҳазор имзо ҷамъоварӣ намуданд. Дар ин бора имрӯз зимни нишасти хабарӣ раиси ҲНИТ Муҳиддин Кабирӣ хабар дод.
Ба гуфтаи ӯ, ба туфайли имкони имрӯз фароҳамоварда аз ҷониби КМИР дар мавриди ба муддати 3 рӯз дароз кардани муҳлати ҷамъоварии имзоҳо, гурӯҳҳои ташаббускори номзад Ойниҳол Бобоназарова ба ҷамъоварии имзоҳо идома медиҳанд.
Абдуқаюми Қаюмзод, котиби матбуотии ситоди пешазинтихоботии Ойниҳол Бобоназарова ба ОИ «Азия-Плюс» итминон дод, ки то соати 18:00-и рӯзи 10-уми октябр шумори зарурии имзоҳо ба ҷонибдории номзадашон ҷамъоварӣ хоҳад шуд.
