Зимни мулоқот бо раиси Маҷлиси миллии Маҷлиси Олии Тоҷикистон Маҳмадсаид Убайдуллоев раиси Думаи давлатии Русия Сергей Наришкин дар парлумони Тоҷикистон ба тасвиб расидани Созишномаи ҳузури пойгоҳи низомии 201-уми Русияро «як рӯйдоди бузургу муҳим» арзёбӣ намуд.
Ба андешаи Наришкин, ба тасвиб расидани созишнома – «яке аз шартҳои таъмини амният дар минтақа аст».
Ӯ чунин мешуморад, ки дар ин ҷо мушкилоти марбут ба таҳиди терроризм, ифротгароӣ ва қочоқи маводи мухаддир мавҷуданд. «Аз ин рӯ, Русияву Тоҷикистон бояд дар ҳамдастӣ амнияти минтақаро таъмин кунанд», – иброз дошт Наришкин.
Номбурда ҳамчунин дар ин робита изҳор намуд, ки ин таҳдидҳо дар робита ба хурӯҷи нерӯҳои низомии эътилофи байнулмилалӣ аз Афғонистон дар соли 2014 метавонанд афзунтар шаванд ва ин «ба тағйирёбии назаррасии ин мушкилот боис шуда метавонад».
