Айни замон дар вилояти Хатлон ба маблағи умумии беш аз 330 млн. доллари ИМА 23 лоиҳаи сармоягузорӣ мавриди амалисозӣ қарор дорад.
Сардори Раёсати Кумитаи давлатии сармоягузорӣ ва идораи амволи давлатии вилояти Хатлон Саймӯмин Мӯсоев ба ОИ «Азия-Плюс» дар ин робита иттилоъ дод, ки ин лоиҳаҳо дар бахшҳои гуногун, аз ҷумла ду лоиҳагӣ дар соҳаи маорифу тандурустӣ, панҷ лоиҳа дар бахши кишоварзӣ, чор лоиҳа дар соҳаи обтаъминкунӣ ва обёрӣ, чор лоиҳа дар бахши энергетика, се лоиҳа дар соҳаи нақлиёт, як лоиҳа дар соҳаи таъминот бо газ ва як лоиҳа дар хоҷагии коммуналӣ татбиқ карда мешаванд.
«Бо кумаки сармоягузорони маҳаллӣ ба маблағи умумии 84 млн. сомонӣ 280 иншооти истеҳсолӣ ва маишӣ бунёд гардида, дар заминаи ин иншоот 3,5 ҳазор ҷойи нави корӣ фароҳам оварда шуд», – иброз дошт Мӯсоев.
Ба қавли ӯ, имсол сармоягузорони Хатлон ба Кумитаи давлатии сармоягузорӣ ва идораи амволи давлатии ҷумҳурӣ 29 лоиҳаи сармоягузорӣ пешниҳод намудаанд, ки 6-тои он маъқул ва дар ҳаҷми 2 млн. сомонӣ маблағгузорӣ шудаанд.
«Баҳри дастгирии лоиҳаҳои сармоягузории соҳибкорони ватанӣ ҳукумати кишвар 33 млн. сомонӣ маблағ ҷудо карда, соҳибкорон имкон доранд, ки лоиҳаҳои худро пешниҳод ва бо фоизҳои паст қарзҳои имтиёзнок дастрас намоянд», – афзуд номбурда.
