Бо шарти аз ҷониби Қирғизистон эътироф гардидани роҳи автомобилгарди пайвасткунандаи Исфара бо ҷамоати тоҷикии Воруху деҳаи Хоҷаи Аъло, Тоҷикистон ба сохтмони роҳи мошингарди Кӯктош-Оқсой-Тамдик, ки қиъаҳои баҳсноки марзро убур мекунад, ба кишвари ҳамсоя розигӣ медиҳад. Дар ин бора ба ОИ «Азия-Плюс» як манбаъ аз ҳукумати Тоҷикистон хабар дод.
Бино ба гуфтаи манбаъ, агар ин масъала бо пазируфтани пешниҳоди мазкури Тоҷикистон ҳал шавад, маҳаллаҳои тоҷикнишини Ворух ва Хоҷаи Аъло дигар ҷазирақаламрав намешаванд. «Агар ин пешниҳод аз ҷониби кишвари ҳамсоя пазируфта шавад, ба ҳалли мушкилоти зиёди мавҷуда дар қитъаҳои баҳскноки марзи давлатӣ мусоидат мекунад», – зикр кард манбаъ.
Манбаъ ҳамчунин гуфт, маълумоти имрӯз аз ҷониби ВАО-и қирғиз интишоршуда дар бораи он, ки дар ҷаласаи комиссияи байниҳукуматии Тоҷикистону Қирғизистон дар Бишкек Тоҷикистон ба идомаи сохтмони роҳи мошингарди Кӯктош-Оқ-Сой-Тамдик розӣ шудааст, аз эҳтимол дур аст.
