Имрӯз дар Душанбе маросими баимзорасии шартнома миёни Корпоратсияи байнулмилалии молиявӣ (IFC) ва Ташкилоти амонатгузории хурди «ИМОН Интернейшнл» дар бораи ҷудо кардани қарзи тиҷоратӣ дар ҳаҷми 5 млн. доллари ИМА баргузор шуд.
Дар доираи ин қарзи тиҷоратӣ «ИМОН Интернейшнл» шабакаи филиалҳояшро афзуда, дар баробари он ба қарздиҳӣ дар бахши кишоварзӣ тавсеъа бахшиданист.
Дар ҷараёни чорабинӣ зикр гардид, ки ин маблағгузорӣ дарозмуҳлат буда, бо асъори миллӣ сурат мегирад, ки он дар бозори тоҷикӣ кам дучор меояд.
Ба гуфтаи директор оид ба кишварҳои Аврупо ва Осиёи Марказии Гурӯҳи IFC оид ба ниҳодҳои молиявӣ Эдвард Строудэрман, маблағгузорӣ бо асъори миллӣ ба афзоиши пешниҳоди қарзҳои дастрас ба фермерҳо, корхонаҳои хурд ва занони соҳибкор имкони мусоид фароҳам меоварад.
«Ин имкон медиҳад, ки талаботи беш аз 75 ҳазор мизоҷон ба маблағгузорӣ дар тамоми минтақаҳои Тоҷикистон қонеъ карда шавад. Бозори қарздиҳии хурди Тоҷикистон пас аз Қирғизистон бозори дуюми бузурги минтақа мебошад, вале ба ҳар ҳол, бозори қарздиҳии хурд дар ҷумҳурӣ яке аз пассттаринҳо боқӣ мемонад. Маълумоте мавҷуд аст, ки ҳиссаи қарздиҳии хурд дар ММД-и Тоҷикистон ҳамагӣ 3,6%-ро ташкил медиҳад, ки албатта, қабули қарорҳои дахлдор барои рушди ин бозорро тақозо мекунад», – гуфт ӯ.
Дар «ИМОН Интернейшнл» дар бораи бо кадом миқдор фоизҳо ҷалб шудани ин воситаҳои молиявӣ маълумот надоданд, вале зикр карданд, ки меъёри фоизҳои миёнаи ин ташкилоти хурди қарздиҳӣ бо сомонӣ аз 14 то 17% ва бо доллари ИМА аз 9 то 13%-и солонаро ташкил медиҳад.
