Созмони хабарнигорони бидуни марз (Reporters Without Borders) аз додгоҳи кассатсионии Ҷумҳурии Тоҷикистон хостааст, ки қарораш алайҳи муҳаррири ҳафтаномаи «Азия-Плюс» Олга Тутубалина ва «Азия Плюс» бекор кунад.
RWB бар он бовар аст, ки қарори додгоҳ оид ба пардохтани 30 ҳазор сомонӣ ба фоидаи даъвогарон – аҳли зиё аслан беасосу Гайримантиқист. Қарори додгоҳро Созмон латмае ба мустақилияти рӯзноманигорони тоҷик хондааст.
«Чун Сарқонуни Ҷумҳурии Тоҷикистон озодии баёнро кафолат додааст, Олга Тутубалина ҳам аз ин ҳукқуқи хеш истифода бурдааст», – зикр гардидааст дар матни RWB.
Ёдовар мешавем, тобистони соли сипаришуда аҳли зиёи мамлакат нисбат ба ҳафтаномаи «Asia-Plus» ва муҳаррири он Олга Тутубалина ба Суди иқтисодии шаҳри Душанбе бо аризаи даъвоӣ шикоят бурда, аз додгоҳ талаб карда буданд, ки барои расонидани зарари маънавӣ аз ҷавобгар 200 ҳазор сомонӣ ҷубронпулӣ руёнида шавад. Ҳамзамон тамоми амволи манқул ва ғайриманқули ӯ ба ҳабс гирифта шавад. Дертар додгоҳи ноҳияи Фирдавсии шаҳри Душанбе ба қарор омад, ки ҳафтанома ва Олга Тутубалина барои расонидани ҷуброни маънавӣ ба даъвогарон 30 ҳазор сомонӣ пардозанд.
Олга Тутубалина дар матлаби худ таҳти унвони «Нозиёиёна дар бораи зиёиён» бо истифода аз суханони Ленин гуфтааст, ки «Зиёиён на мағз, балки наҷосати миллатанд».
