Зимни сафари шиносоии ҳайати Тоҷикистон ба Русия аз 18 то 25-уми май дар доираи лоиҳаи Дастгоҳи иҷроияи президент оид ба таҳкими имконоти хадамоти муҳоҷират ошкор гардид, ки дар тавқифгоҳи муваққатӣ барои шаҳрвандони хориҷии ноҳияи Егоревски вилояти Маскав 50 шаҳрванди Тоҷикистон истирдод ба ватанро интизоранд.
Тавре ба «Азия-Плюс» котиби матбуотии намояндагии Вазорати меҳнат, муҳоҷират ва шуғли аҳолии Тоҷикистон дар Русия Иброҳим Аҳмадов хабар дод, ҳадафи сафар таҳкими ҳамкорӣ дар масоили танзими муҳоҷирати корӣ, табодули таҷриба ва маълумоти оморӣ миёни мақомоти муҳоҷирати кишварҳо ва ошно гардидан бо шароит ва навгониҳо дар фаъолияти сохторҳои дахлдори марбут ба муҳоҷирати Русия аст.
«Зимни боздид аз тавқифгоҳи мувақкатии ноҳияи Егоревск маълум шуд, ки дар ин ҷо дар баробари шаҳрвандони дигар кишварҳо 50 шаҳрванди Тоҷикистон низ будубош доранд, ки бо қарори суд ба қонуншикании маъмурӣ дар бахши муҳоҷират айбдор дониста шуда, бояд ба ватан истирдод шаванд», – иброз дошт ӯ.
Ба қавли вай, намояндагони сохторҳои давлатии Тоҷикистон бо шароитҳои нигаҳдории шаҳрвандони Тоҷикистон ошно гардида, бо онҳо суҳбат кардаанд. «Ба гуфти муҳоҷирон, шароити ин тавқифгоҳ қаноатбахш буда, бошандагони он се вақт бо ғизо ва шароитҳои зарурии санитарӣ таъминанд. Пас аз анҷоми тартиби барасмиятдарории ҳуҷҷатҳо онҳо ба ватан фиристода мешаванд», – гуфт Аҳмадов.
Зимнан зикр гардид, ки дар ҷараёни суҳбат муҳоҷирон аз намояндагони мақомоти муҳоҷирати Тоҷикистон дархост кардаанд, ки онҳоро бо телевизион таъмин кунанд. «Дар посух кормандони намояндагиии Вазорати меҳнат, муҳоҷират ва шуғли аҳолии Тоҷикистон ваъда доданд, ки рӯзҳои наздик дархосташон қаноатбахш карда мешавад», – афзуд номбурда.
