Дар боғи кӯдакони пойтахт рӯзи 7-уми июн нахустин эко-ярмаркаи «Фримаркет» дар Тоҷикистон доир мегардад, ки аз ҷониби ташкилоти экологии «Маленькая Земля» (Замин хурд) созмон дода мешавад.
Бино ба иттилои дастандаркорони чорабинӣ, дар эко-ярмарка ҳамаи хоҳишмандон метавонанд чизҳо ё предметҳоеро, ки барояшон нолозим аст, супоранд ё иваз намоянд. Ярмарка ба мунорсибати Рӯзи умумиҷаҳонии муҳити зист гузаронида шуда, воридшавӣ ба он ройгон аст.
Дар доираи чорабинӣ ҳунарманд Бахтиёр Назирбоев хотири ҳозиринро болида карда, Баҳром Комилов бепул мӯйи сарҳоро ба тартиб меорад ва ҳамчунин аз ҷониби иштирокчиён шеърҳо қироат шуда, коғазкӯҳна ҷамъоварӣ мегардад.
Бино ба маълумоти ташкилоти экологии «Маленькая Земля», ҳадафи аслии баргузории эко-ярмарка ҷалби мардум ба истифодаи оқилона ва сарфакоронаи захираҳо ва муҳим будани табодул бо якдигар, манфиат овардан ва кумаки ройгон ба афроди ниёзманд аст.
Гуфта мешавад, дар эко-ярмарка ҳамаи хоҳишмандон метавонанд иштирок кунанд. Тамоми чизу предметҳо бепул ва бидуни бозгашт қабул шуда, ба ярмарка овардани ҳама гуна чизу ашёи нолозим – зарф, сарулибос, китоб, бозичаҳо, техникаи маишӣ, асбобу лавзомот, туҳфаҳо, дискҳо ва ғайра имконпазир аст. Шарти асосӣ – ашёву чизҳо бояд комил ва тозаву коршоям бошанд.
