Модари маҳбусе, ки аз болои раиси Ҳизби-сотсиал-демократии Тоҷикистон ба суд шикоят бурда буд, санаи 5-уми июн аз олам даргузашт. Дар ин бора ба «Азия-Плюс» хешону наздикони марҳум Савлат Сафолова хабар доданд.
Ёдрас мекунем, ки наздикони маҳбус Маҳмадраҳим Саидов барои паҳн кардани маълумоти бардурӯғ дар бораи марги ӯ дар ҷаримагоҳи зиндон, аз раиси ҲСДТ Раҳматилло Зойиров дар ҳаҷми 10 ҳазор ва 1,5 ҳазор товони зарари моддӣ ва маънавӣ тақозо намуданд.
Санаи 14-уми майи соли равон суди ноҳияи Синои пойтахт оид ба ин даъво қарор содир намуд, ки мутобиқи он, Раҳматилло Зойиров барои паҳн кардани маълумоти бардурӯғ гунаҳкор эътироф гардида, ба пардохти ҷарима ба сифати ҷуброни зарари маънавӣ дар ҳаҷми 8 ҳазору 750 сомонӣ уҳдадор шуд. Ин маблағ миёни ду даъвогари асосӣ – наздикони маҳбус Маҳмадраҳим Саидов ва маъмурияти муассисаи ислоҳии рақами 1 мутаносибан 4750 ва 4000 сомонӣ тақсим мешавад.
Аммо айни замон Раҳматилло Зойиров аз пайи шикоят овардан ба ин қарори суд дар зинаи таҷдиди назар машғул аст.
Ба гуфтаи наздикони зани фавтида, аз маҳкум шудани писараш Маҳмадраҳим Саидов ӯ хеле озурдаву ғамгин буда, вале маълумоти бардурӯғ дар бораи марги писараш ӯро боз ҳам озурдатар кардааст.
