Дар охири моҳи августи соли ҷорӣ кормандони Агентии назорати маводи нашъаовари назди Президенти ҶТ дар доираи гузаронидани семинарҳои таълимӣ-методӣ барои муовинони командирони қисмҳои ҳарбии Сарраёсати Қӯшунҳои сарҳадии КДАМ ҶТ оид ба корҳои тарбиявӣ семинари омӯзишӣ гузарониданд.
Бино ба иттилои шуъбаи робита бо ҷомеаи АНМН, ба иштирокчиёни семинар дар бораи вазъи вобаста ба маводи нашъаовар дар Тоҷикистон ва минтақаи Осиёи марказӣ, дар бораи навъҳои нави маводи нашъаовар, ки дар қаламрави Тоҷикистон дар муомилоти ғайриқонунӣ мавҷуд мебошанд, иттилоот дода шуд.
Қайд гардид, ки сарҳадбонони тоҷик дар хатти аввали мубориза бар зидди маводи нашъаовар қарор доранд ва бурдани муборизаи беамон бар зидди ин падидаи номатлуб аз онҳо вобастагии калон дорад.
Гуфта мешавад, гузаронидани ин гуна семинарҳо аз тарафи кормандони Агентӣ то охири сол ба нақша гирифта шудааст.
